ಮೌನ

ಕೆರೆ ದಂಡೆಗೆ ತಳ ಹಚ್ಚಿ ಕೂತೆ
ಯಾಕೋ ಮೌನ ಎಂದೆನಿಸುತಿತ್ತು
ಸಾಲು ಸಾಲು ಅಲೆಗಳು ಹತ್ತಿರತ್ತಿರವಾಗುತ್ತಾ
ಏನನ್ನೋ ಹೇಳುತಿದ್ದವು,
ಕೈಬೀಸಿ ಕರೆದಂತೆ ಭಾಸವಾಗುತಿತ್ತು,

ನನ್ನುಸುರಿನ ಸದ್ದು ಕಿವಿಯ ಮುಟ್ಟುವಂತೆ
ಕೇಳುವಷ್ಟು ನಿಶ್ಯಬ್ದ,
ತಣ್ಣಗಿನ ಗಾಳಿಗಮಲು ಸದ್ದಿಲ್ಲದೆ
ಲೋಕಸಂಚಾರಿಯಂತೆ ತಿರುಗುತಿತ್ತು.

ನೀಲಿ ಬಾನು ಕಪ್ಪಿಕ್ಕುತಿತ್ತು
ಆ ನೀರವ ಮೌನಕ್ಕೆ,
ಮೋಡ ಮೋಡ ಕೂಡಿದಷ್ಟು
ಮೌನಕ್ಕೆ ವಧುವಿನ ಮೆರಗು
ಬಾನಿಗೊಚ್ಚಿದ ಸೆರಗು

ಮೀನುಗಳ ಪಿಸುಮಾತು ಕೇಳಿಸುವಷ್ಟು,
ಅಲೆಗಳು ಪದೇ ಪದೇ ದಂಡೆಗಿಕ್ಕುತಿದ್ದ
ಮುತ್ತಿನಿ ಸದ್ದು ಕೇಳುವಷ್ಟು ಮೌನ
ಆವರಿಸಿದೆ....ಹಿತವಾಗಿದೆ....