ಕಟು ವಾಸ್ತವ
ನಾರುತಿದ್ದ ತಿಪ್ಪೆಯಲ್ಲಿ
ಹರುಕಲು ಟೋಪಿ ಹಾಕಿಕೊಂಡು
ಕಸ ಆಯುತಿದ್ದ
ಹುಡುಗ ಅಲ್ಲೇ ಯಾರೋ
ಬಿಸಾಡಿದ್ದ ಕೊಳೆತ ಟೊಮ್ಯಾಟೊಗಳತ್ತ
ಆಸೆಯಿಂದ ನೋಡುತಿದ್ದಾನೆ,
ಕೆ.ಎಫ್.ಸಿಯ ಮುಂದುಗಡೆ
ಚಿಲ್ಲರೆಗೆ ಕೈ ಚಾಚುತ್ತಾ ಕೂತಿದ್ದ ಅಜ್ಜಿ
ರೇಬಾನ್ ಗ್ಲಾಸು ಹಾಕಿಕೊಂಡು
ಸೊಂಟ ಬಳುಕಿಸುತ್ತಾ
ಹೊರ ಬಂದ ಹುಡುಗಿಗೆ
ಕಾಣಿಸಲಿಲ್ಲ,
ಎಂಟು ದಾಟದ ಹುಡುಗಿ
ಪುಟ್-ಪಾತಿನ ಮೇಲೆ
ಆಸೆ ಕಂಗಳಿಂದ ಅವರಿವರ
ಬೂಟುಗಳ ನೋಡುತಿದ್ದಾಳೆ
ಪಾಲೀಷಿಗೆ,.... ಹಸಿದ ಹೊಟ್ಟೆಯ
ಗೊಣಗಾಟಕ್ಕೆ.
ಬ್ರಾಂಡೆಡ್ಡು ಮಾಲುಗಳನ್ನೇ
ತುಂಬಿಕೊಂಡಿದ್ದ ಶಾಪಿಂಗ್ ಮಾಲ್ ಗಳೋಳಗೆ
ಸೆಂಟು ಹೊಡೆದುಕೊಂಡು ಘಂ ಎನ್ನುತಿದ್ದ
ತರಹೇವಾರಿ ಜನ,
ಹೊಟ್ಟೆ ತುಂಬಿದವರೇ ಎಲ್ಲ
ಜಾಗತೀಕರಣದ ಜೊಳ್ಳಿನೊಳಗೆ
ಬಣ್ಣ ಹಚ್ಚಿಕೊಂಡವರೇ
ಹಸಿವಿನ ಒರತೆಗೆ
ಅಂಗಲಾಚುತಿದ್ದವರೊಂದು ಕಡೆಯಾದರೆ
ಹೊಟ್ಟೆ ತುಂಬಿ
ಕುರುಡಾದವರೊಂದು ಕಡೆ.
ಈ ಕಟು ಸತ್ಯದ ನಡುವೆ
ಮೂಕರಂತೆ ಬದುಕುತಿದ್ದೇವೆ.
ಮೂಕರಂತೆ ಬದುಕುತಿದ್ದೇವೆ
-ಪ್ರವರ
NijavaagaLu naavu mookare swaami...vaastavakke anugunavaagide nimma kavana
ReplyDelete