ಒಬ್ಬಾತ ಮತ್ತು ಓಯಸಿಸ್ಸು

ಮರಳು ದಿಬ್ಬಗಳ ಮೇಲೆ
ಓಡುತಿದ್ದನೊಬ್ಬ
ಒಂದೇ ಸಮನೆ ಉಸಿರ
ಬಿಗಿ ಹಿಡಿದು

ಹಿಂತಿರುಗಿ ನೋಡಿದರೆ
ತನ್ನದೇ ಹೆಜ್ಜೆಯ
ಗುರುತೂ ಇಲ್ಲ,
ಬಣಗುಡುವ ಮರಳುಗಾಡಲ್ಲಿ
ಜೀಗುಡುವ ಸದ್ದಿನ
ಹೊರತು ಮತ್ತೇನು ಇಲ್ಲ

ದೂರದಲ್ಯಾರೋ
ಕಾಣುತಿದ್ದಾರೆಂದು
ಅವರಿಂದೆರಡು ಹನಿ ನೀರು
ಸಿಕ್ಕು, ಒಣಗಿಹ ಬಾಯ
ದಾಹ ತೀರೀತೆಂಬ
ಆಸೆಗುದುರೆಯನೇರಿ
ಬಿಸಿಲಗುದುರೆಯ ಹಿಂದೆ
ಸುಮ್ಮನೆ ಓಡುತಿದ್ದಾನೆ

ಕಾಲಿಗತ್ತಿದ ಉಸುಕು
ಓಡಬೇಡೆಂದು ತಡೆಯಲಾಗದೆ
ಮತ್ತೆ ಮತ್ತೆ ಉದುರುತ್ತಿದೆ
ಬಿಸಿಲಗನ್ನಡಿಯಲ್ಲಿ ಯಾರೂ ಇಲ್ಲ
ಅವೆಲ್ಲವೂ ಭ್ರಮೆಯ ಬಿಂಬವಷ್ಟೆ.

ಇನ್ನೂ ಓಡುತಿದ್ದಾನೆ,
ವಾಸ್ತವದ ಅರಿವಿಲ್ಲದೆಯೇ
ಓಡುತ್ತಲೇ ಇದ್ದಾನೆ