ಕತ್ತಲುಂಡವು ಮಂದಿರ

ನೀಲಿಯಾಗಸದಲ್ಲಿ ಯಾರೋ
ನಿನ್ನ ನೆನೆಯುತ ಕೂತರು
ತೇಲಿ ಬಂದ ಮೋಡವೆಲ್ಲವ
ಮಡಿಸಿ ಬದಿಯಲಿ ಬಿಟ್ಟರು

ದಟ್ಟ ಹೆರಳಡಿಯಲ್ಲಿ ರಾತ್ರಿಯ
ಕನಸು ಕಾಣುತ ಚಂದಿರ
ಬೆಳದಿಂಗಳನ್ನು ಮರೆತೆಬಿಟ್ಟನು
ಕತ್ತಲುಂಡವು ಮಂದಿರ

ಧ್ಯಾನಗ್ರಸ್ಥ ರಾತ್ರಿಯೆಲ್ಲಾ
ನಿನ್ನ ನೆನಪ ಮುಲುಕಾಟವು
ಮೌನಿ ದೀಪಕೆ ಎಣ್ಣೆಯುಣಿಸಿ
ಜೀವ ತೆತ್ತಿತು ಬತ್ತಿಯು

ನಿನ್ನ ತೇಲಿಸಲೆಂದು ಅಲೆಯು
ಬಾಹುಗಳನು ಚಾಚುತಿಹುದು
ನೊರೆಯು ಉಕ್ಕಿ ಮರಳ ದಡಕೆ
ಸೌಖ್ಯ ಪತ್ರವ ಹಂಚುತಿಹುದು
-ಪ್ರವರ