ಫಸ್ಟ್ ಬೆಂಚ್ ಸುಂದ್ರಿ

ಮೊದಲ ಬೆಂಚಲಿ ನಗದೆ ಕುಳಿತ
ಚೆಂದಗೆನ್ನೆಯ ಹುಡುಗಿಯೆ
ಚೂರು ನಗದ ಕೆಂಪು ತುಟಿಗೆ
ಯಾವ ಪಾಪವು ಅಡರಿದೆ

ಹೆರಳ ತುಂಬ ಮಲ್ಲೆ ಹೂಗಳು
ಘಮವ ಸುಮ್ಮನೆ ಬೀರಿವೆ
ಹಿಂದೆ ಕೂತ ಹೈಕಳೆಲ್ಲ
ಹೊಳ್ಳೆ ಅರಳಿಸಿ ಹೀರಿವೆ.

ಅಷ್ಟು ಗದ್ದಲ ನಡುವೆ ನಿನ್ನ
ಗೆಜ್ಜೆ ಸದ್ದು ಕೇಳಿದೆ,
ಎಲ್ಲ ಕಿವಿಗಳು ನಿನ್ನ ಕಡೆಯೇ
ದಿಕ್ಕ ಬದಲಿಸಿ ನೋಡಿವೆ.

ಎದೆಗೆ ಗಕ್ಕನೆ ತುಂಬಿಕೊಂಡೆ
ಕಣ್ಣಿನೊಳಗೆ ಬಿಡಿಸಿಕೊಂಡೆ
ರಾತ್ರಿ ಕನಸಿಗೆ ಬಿಟ್ಟುಕೊಂಡೆ
ಹುಳಗಳಂತೆ ನಿನ್ನನು
-ಪ್ರವರ