ಬಯಲ ಹುಡಿ

ಅರೆ ಧೂಳು ಅಡರಿದೆಯಲ್ಲ ಹತ್ತಿ ಬಟ್ಟೆಯಿಂದ ಮೆದುವಾಗಿ ಒರೆಸಬೇಕಾಗಿದೆ, ಗೋಡೆಯ ಪಕ್ಕದಲ್ಲೇ ತುಂಬಾ ವರ್ಷಗಳಿಂದ ಅಂಟಿಕೊಂಡಿದೆ ನಮ್ಮಜ್ಜಿಯಂತೆ, ಓ, ಆಜ್ಜಿ ಈಗ ಗೋಡೆಯ ಮೇಲೆ ನಗುತ್ತಾ ನೇತಾಡುತ್ತಿದ್ದಾರೆ ಹಾರ ಹಾಕಿಕೊಂಡು, ಹಳೆ ಮಣ್ಣಿನ ಮಾಳಿಗೆಯ ಹೊತ್ತಿದ್ದ ಸಾಗುವಾನಿ ಕಟ್ಟಿಗೆಯಿಂದ ಮಾಡಿದ್ದ ಕಂಬವಿರಬೇಕು, ಅಮ್ಮ ನನ್ನ ಊಟಕ್ಕೆ ಕರೆದಾಗಲೆಲ್ಲ ಬೇಡವೆಂದು ಅದನಪ್ಪಿ ಅಳುತಿದ್ದೆ ಆದರೂ ಅಲುಗಾಡದೇ ನಿಂತಿದೆಯಲ್ಲ ಅಪ್ಪ ಕೆಲಸಕ್ಕೆ ಸೇರಿದ ಹೊಸತಲ್ಲಿ ಕೊಂಡಿದ್ದ ಸೈಕಲ್ಲಂತೆ ಕಡ್ಡಿಗಳೊಂದಿಷ್ಟು ಮುರಿದಿವೆ, ತುಕ್ಕಿಡಿದ ಅದಕ್ಕೆ ಸೀಟೂ ಇಲ್ಲ, ನಾ ಚಿಕ್ಕವನಿದ್ದಾಗ ಅಪ್ಪನ ಮುಂದೆ ಕೂತು ಸವಾರಿ ಮಾಡುತಿದ್ದೆ, ಗಾಳಿಗೆ ಅಂಗಿಯುಬ್ಬಿ ಡುಮ್ಮನಾಗುತ್ತಿದ್ದೆ, ನಾನು ಮಲಗಲೆಂದು ಜೋಲಿ ಕಟ್ಟುತ್ತಿದ್ದ ಅಮ್ಮನ ಸೀರೆಗಳೆಲ್ಲಾ ಕೌದಿಯಾಗಿವೆ, ಚಳಿಗೆ ಬೆಚ್ಚಗಾಗಿಸಲು, ಅದನ್ನು ಹೊಲಿದಿದ್ದು ಕೆಳಗೆರೆಯ ಚೌಡಮ್ಮನಂತೆ ಆಕೆ ಮುಖವಾಗಲೇ ಸುಕ್ಕುಗಟ್ಟಿದೆಯಂತೆ, ಅರೆ!!! ನಾನೇಕೆ ಭಾವುಕನಾಗುತ್ತಿದ್ದೇನೆ, ಎಲ್ಲಕ್ಕೂ ವಯಸ್ಸಾಗಲೇ ಬೇಕಲ್ಲವೇ, ನಿನ್ನೆ ಮೊನ್ನೆಯವರೆಗೆ ಜೋಲಿಯೊಳಗಾಡುತಿದ್ದ ನನಗೂ ಸಹ...... -ಪ್ರವರ photo by: surya avi

ಹೇ ಗೋರಿಯೆ! ನಾನು ನಿನ್ನೊಡಲ ಸೇರುವವನಿದ್ದೇನೆ ಕೊಂಚ ದಾರಿ ಮಾಡಿಕೊಡು. ನಾ ಹೊದ್ದ ಮಣ್ಣಿನ ಮೇಲೆ ಬೆಳೆಯಲಿ ಒಂದಿಷ್ಟು ಹೂವುಗಳು, ಸ್ವಲ್ಪ ತಡಮಾಡಿದರೂ ಯಾರಾದರೊಬ್ಬರು ಬೆಂಕಿ ಇಡುತ್ತಾರೆ ನನಗೆ ಸುಟ್ಟು ಬೂದಿಯಾಗಲು\ ಇಷ್ಟವಿಲ್ಲ, ಎದೆಗೂಡಿನಲ್ಲಿಹ ಕನಸುಗಳ ಚೀರಾಟ ಕೇಳುವಷ್ಟು ಶಕ್ತನಲ್ಲ! ಮಣ್ಣನಪ್ಪಿ ಮಲಗಬೇಕಿದೆ ನಾನು. ಆಸೆಗಳಿಗೆ ಜೀವ ಬಂದು ಚಿಗುರೊಡೆದಾವು, ಕಿಕ್ಕಿರಿದು ತುಂಬಿರುವ ಕನಸುಗಳಿಗೆ ರೆಕ್ಕೆ ಬಂದಾವು ಮತ್ತೆ ಹಾರಿಯಾವು ದಾರಿ ಮಾಡಿಕೊಡು ಗೋರಿಯೇ ದಾರಿ ಮಾಡಿಕೊಡು ನಾನು ನಿನ್ನೊಡಲ ಸೇರುವವನಿದ್ದೇನೆ -ಪ್ರವರ photo by: surya avi