ಗುಬ್ಬಿ ಮತ್ತು ಹೆಮ್ಮರ

ನೂರಾರು ವರುಷಗಳಿಂದ

ಬದುಕಿದ್ದ ಹೆಮ್ಮರವೊಂದು

ಬಿಕ್ಕಿಸಿ ಬಿಕ್ಕಿಸಿ ಅಳುತ್ತಿತ್ತು,

ಕೊಂಬೆ ಮೇಲೆ ಕೂತಿದ್ದ

ಗುಬ್ಬಿ ಅಳುವ ಕಾರಣ ಕೇಳಿತು....

ಮಂತ್ರಿ ಹೊಸಮನೆಗೆ

ಹೊಸ ಕಿಡಕಿ ಬಾಗಿಲುಗಳು

ಬೇಕಂತೆ ಅದಕೆ ನನ್ನ

ಬುಡದಿಂದ ಕತ್ತರಿಸುವರಂತೆ.....

ಅದಕೆ ಗುಬ್ಬಿ ಸಮಾಧಾನಪಡಿಸಲು

ಎಲ್ಲರೂ ಒಂದಲ್ಲಾ ಒಂದು ದಿನ

ಸಾಯಲೇ ಬೇಕು ತಾನೆ ಎನ್ನಲು,

ಮರ ಗೊಣ್ಣೆ ಒರೆಸಿಕೊಳ್ಳುತ್ತಾ

ಅಳುತ್ತಿರುವುದು ನಾ ಸಾಯುತ್ತೇನೆಂದಲ್ಲ!

ಇಷ್ಟು ದಿನ ನನ್ನ ತಬ್ಬಿಕೊಂಡು

ಮಲಗುತ್ತಿದ್ದ ಲತೆ ಒಂಟಿಯಾಗುವಳೆಂದು!

ಈಗ ಅಳುವ ಸರದಿ ಗುಬ್ಬಿಯದು....